நாட்டில் ஊடகவியலாளர்களுக்கு வெளியான மகிழ்ச்சி அறிவிப்பு!

அடுத்த வருடத்தில் ஊடகவியலாளர்களுக்கான காப்பீட்டுத் திட்டத்தை ஆரம்பிக்கத் திட்டமிட்டுள்ளதாக சுகாதார மற்றும் ஊடக அமைச்சர் நளிந்த ஜயதிஸ்ஸ தெரிவித்துள்ளார். ஊடக அமைச்சினால் ஏற்பாடு செய்யப்பட்ட "அசி திசி" ஊடகவியல் புலமைப்பரிசில் திட்டத்தின் 2025ம் ஆண்டுக்கான விருது வழங்கும் விழா கடந்த வெள்ளிக்கிழமை (22), நாரஹேன்பிட்டி ஊடக அமைச்சில் நடைபெற்றது.  

இந்த விழாவில் அமைச்சர் நளிந்த ஜயதிஸ்ஸ தலைமை வகித்தார். நிகழ்வின்போது அவர் கருத்து வெளியிடும்போது, ஊடகவியலாளர்களின் நலனுக்காக புதிய காப்பீட்டுத் திட்டம் ஒன்று அடுத்த ஆண்டில் செயல்படுத்தப்படும் எனத் தெரிவித்தார்.

மேலும் கருத்து தெரிவித்த அமைச்சர் நளிந்த ஜயதிஸ்ஸ,“2006 ஆம் ஆண்டு வெறும் 11 ஊடகவியலாளர்களுக்கு உதவித்தொகை வழங்குவதன் மூலம் வெகுஜன ஊடக அமைச்சினால் இந்த திட்டம் ஆரம்பிக்கப்பட்டது. இதுவரை, இந்த திட்டத்தின் கீழ் மொத்தமாக 1,133 ஊடகவியலாளர்களுக்கு உதவித்தொகைகள் வழங்கப்பட்டுள்ளன” என தெரிவித்தார்.

இந்த ஊடகவியலாளர்கள், ஊடக அமைச்சின் செயலாளர் தலைமையிலான விசேட குழுவினால் தேர்ந்தெடுக்கப்பட்டதாகவும், இந்த நாட்டில் ஊடகவியலாளர்கள் தங்கள் தொழில் தொடர்பான திறன்களை மேம்படுத்திக்கொள்ள, அரசாங்கம் பல்வேறு வாய்ப்புகளை வழங்கி வருவதாகவும் அமைச்சர் நளிந்த ஜயதிஸ்ஸ சுட்டிக்காட்டினார்.

புதிய ஊடகக் கொள்கையின் தயாரிப்பு, பத்திரிகையாளர்களுக்கான நெறிமுறைக் கோவையின் உருவாக்கம், மேலும் பத்திரிகையாளர்களுக்கான தனிநிலைக் கழகம் ஒன்றைத் தொடங்குதல் உள்ளிட்ட பல முக்கிய திட்டங்களை வெகுஜன ஊடக அமைச்சகம் ஏற்கனவே நடைமுறைப்படுத்தியுள்ளது.

ஊடகத் துறை, ஒரு சமூகத்தின் நான்கு முக்கியமான தூண்களில் ஒன்றாக காணப்படுவதுடன், மீதமுள்ள மூன்று தூண்கள் நீதித்துறை, சட்டமன்றம் மற்றும் நிர்வாகத் துறைகளாகும். அரசியல் துறை என்பது ஆய்வு செய்யப்பட வேண்டியதுடன், பயிற்சி பெற வேண்டிய ஒரு முக்கிய துறையாகும். பொதுமக்களின் ஒப்புதலுடன் அரசியல் துறையில் அடியெடுத்து வைக்கும் ஒருவருக்கு, அதனைத் தொடர்ந்து தமது திறன்கள், திறமைகள் மற்றும் நிபுணத்துவத்தை தொடர்ந்து மேம்படுத்திக் கொள்வது அவசியம். இவ்வாறே, இதே நிலை பத்திரிகைத்துறைக்கும் பொருந்தும்.

“பத்திரிகையாளர்கள் தங்களின் திறமைகளையும் அறிவையும் நாட்டிற்கு வழங்கினால், அரசாங்கம் எதிர்பார்த்த முன்னேற்றத்தை எட்ட இயலும். வெளிநாடுகளில் அங்கீகரிக்கப்பட்ட பயிற்சிகள், பட்டங்கள் மற்றும் அனுபவப் பரிமாற்றத் திட்டங்களில் உள்ளூர் பத்திரிகையாளர்களை இணைத்துக்கொள்வதற்காக, தற்போது பல வெளிநாட்டு இராஜதந்திரிகளுடன் கலந்துரையாடி வருகிறோம். அதற்கான வாய்ப்புகள் விரைவில் உருவாகும். மேலும், அடுத்த ஆண்டில் ஊடகவியலாளர்களுக்கான காப்பீட்டுத் திட்டத்தை ஆரம்பிக்க எங்களது திட்டமிடல் முன்னேறி வருகிறது” என்று அமைச்சர் தெரிவித்தார்.

இந்த நிகழ்வில் சுகாதார மற்றும் ஊடக அமைச்சின் செயலாளர் நிபுணர் கலாநிதி அனில் ஜாசிங்க, ஊடக அமைச்சின் கூடுதல் செயலாளர்கள் தீபா லியனகே மற்றும் என்.ஏ.கே.எல். விஜேநாயக்க, அரசாங்க தகவல் பணிப்பாளர் நாயகம் ஹர்ஷ பண்டார, இலங்கை ஒலிபரப்புக் கூட்டுத்தாபனத்தின் தலைவர் பேராசிரியர் உதித கயாஷன், மேலும் பல ஊடகவியலாளர்கள், ஊடக அமைச்சின் அதிகாரிகள் கலந்து கொண்டனர்.