அரச ஊழியர்கள் தொடர்பில் இறுகும் கட்டுப்பாடுகள்

சுகாதார மற்றும் வெகுஜன ஊடக அமைச்சர் மருத்துவர் நளிந்த ஜயதிஸ்ஸ வெளியிட்டுள்ள அறிவிப்பில், நியாயமான சம்பளமும், மேலதிக நேர கொடுப்பனவுகளும் வழங்கப்பட்டுள்ள நிலையில், திட்டமிடப்பட்ட வேலைநிறுத்தம் நியாயமற்றது என்று அவர் தெரிவித்துள்ளார்.  

இதனையடுத்து, சம்பளம் மற்றும் மேலதிக நேர கொடுப்பனவுகள் சரியான முறையில் வழங்கப்படும் என்பதால், கைரேகை (Fingerprint) இயந்திரங்களின் பயன்பாடு கட்டாயமாகும் என்றும் அவர் உறுதியளித்தார். இவ்வகை அறிவிப்பு, நேற்று (17) அரசாங்க தகவல் திணைக்களத்தில் நடைபெற்ற ஊடகவியலாளர் சந்திப்பில் இடம்பெற்றது.

இதற்கிடையில், வேலைநிறுத்தம் மூன்று முக்கிய காரணிகளால் கடுமையாக பாதிக்கப்பட்டுள்ளதாகவும், விடுமுறைகள் ரத்து செய்யப்பட்ட நிலையிலும் பணிக்கு வராத ஊழியர்களுக்கு எதிராக கடுமையான நடவடிக்கைகள் மேற்கொள்ள வேண்டியிருக்கும் என தபால் மா அதிபர் எஸ். ஆர். டபிள்யூ. எம். ஆர். பி. சரத்குமார தெரிவித்துள்ளார்.  

அவர் மேலும் தெரிவித்ததாவது,“தபால் துறையில் சுமார் 22,000 பேர் பணிபுரிகின்றனர். சம்பள உயர்வுகளுக்கு முன்னர், தபால் துறையின் வருடாந்த வருமானம் ரூ. 14 பில்லியனாக இருந்தது,  இந்நிலையில், செலவுகள் ரூ. 18 பில்லியனாக இருந்தன. அதாவது, சம்பள உயர்வுகள் வழங்கப்படுவதற்கும் முன்பாகவே தபால் துறைக்கு ரூ. 400 மில்லியனை கடந்த அளவுக்கு கூடுதல் செலவு ஏற்பட்டது, அதனை அரசு திறைசேரி மூலமாக ஏற்க வேண்டிய நிலை ஏற்பட்டது” எனவும் அவர் குறிப்பிட்டார்.

சம்பள உயர்வுக்குப் பிறகு அஞ்சல் துறை தனது வருமானத்தை அதிகரிக்கவில்லை என்றால், தற்போதுள்ள செலவுச் சுமை ரூ. 800 முதல் 1000 மில்லியன் வரை அதிகரிக்க வாய்ப்பு உள்ளது. அந்தவகையில், இதற்கான சரியான அணுகுமுறை என்னவென்றால், இந்த சம்பள உயர்வை, ஊழியர்கள் மேலதிக உழைப்பாக ஏற்று,  அதற்கேற்ப தங்களது துறையின் வருமானத்தை அதிகரிக்க தேவையான நடவடிக்கைகளை மேற்கொள்வதே என தபால் மா அதிபர் தெரிவித்தார்.

இதற்குத் தேவையான அனைத்து வசதிகளையும் அரசாங்கம் தற்போது வழங்கி வருகிறது. கடந்த 08 மாதங்களில் நாங்கள் ஆட்சேர்ப்பைத் தொடங்கியுள்ளோம். அனைத்து அரசு ஊழியர்களுக்கும் சம்பள உயர்வுகள் வழங்கப்பட்டபோது, அஞ்சல் துறை ஊழியர்களுக்கும் அதே மாதிரியான உயர்வுகள் வழங்கப்பட்டுள்ளன.

மார்ச் 2024 இல், தரம் II அஞ்சல் சேவை அதிகாரியின் அடிப்படை சம்பளம் ரூ. 32,375 ஆக இருந்தது. ஜனவரி 2027 ஆம் ஆண்டுக்குள், அந்த சம்பளம் ரூ. 54,650 ஆக உயர்த்தப்படும். இதேவேளை, 2025 ஏப்ரல் மாதம் முதல், மேலதிக நேர பணிக்கு வழங்கப்படும் ஊதியம் ரூ. 54,650 அடிப்படையில் கணக்கீடு செய்யப்படும் எனவும் தெரிவிக்கப்பட்டுள்ளது.

இது வழங்கப்பட்டிருந்தாலும், ஏற்கனவே திறைசேரியிலிருந்து ரூ. 400-500 கோடி செலுத்தி வரும் துறையின் சேவைகளை சீர்குலைப்பது நியாயமல்ல. இது திறைசேரியின் மீது மேலதிக சுமையை ஏற்படுத்தும். நியாயமான ஊதியம் மற்றும் மேலதிக நேர கொடுப்பனவுகள் வழங்கப்பட்டுள்ள போது, இந்த திட்டமிடப்பட்ட வேலைநிறுத்தம் நியாயமற்றது என்பதை நாங்கள் அன்புடன் தெரிவித்துக்கொள்கிறோம்.

இரண்டாவதாக, மேலதிக நேர கொடுப்பனவுகளை வழங்கும் போது கைரேகை இயந்திரம் கட்டாயமாக செயல்படுத்தப்படுவதே நியாயமானது என நான் கருதுகிறேன்.

அரசு ஊழியர்களும் பொது அதிகாரிகளும் நாட்டின் மக்களின் வரிப் பணத்திற்கு பொறுப்புகூர வேண்டும். இந்த இயந்திரம் நீண்டகாலமாக நிறுவப்பட்டிருந்தாலும் செயல்படுத்தப்படவில்லை. இப்போது மேலதிக நேரம் மற்றும் அடிப்படை சம்பளத்திற்கு இந்த முறையில் கைரேகை செயல்படுத்தப்படுகிறதைக் குறிப்பிடுகிறோம். இதற்கான சில உடன்பாடுகள் தொழிற்சங்கங்களுடனும் ஏற்பட்டுள்ளன.

அதன்படி, இந்த நடவடிக்கைகள் முன்னெடுக்கப்பட்டு வருகின்றன. அஞ்சல் துறைக்கு பொறுப்பான அமைச்சராக, இந்த வேலைநிறுத்தங்களை உடனடியாக நிறுத்தி, அவ்விடமிருந்து முழுமையான அறிக்கை அளிக்குமாறு கேட்டுக்கொள்கிறோம். நீங்கள் ஒரு மணி நேரம், ஒரு நாள் அல்லது இரண்டு நாட்கள் கூட வேலைக்கு வராவிட்டால், அஞ்சல் துறையின் வருவாய் பாதிக்கப்படும். இதனால் திறைசேரியின் மீது கூடுதல் சுமை ஏற்படும் என்பதையும் நினைவில் கொள்ள வேண்டும்.

எதிர்காலத்தில் உங்களுக்கு வழங்கப்படும் சம்பள உயர்வு அல்லது கூடுதல் நேரம் தொடர்பான பிரச்சினைகள் மீண்டும் எழுவதாக இருந்தால், அதை நியாயமற்ற வேலைநிறுத்தமாகவே நான் கருதுவேன் என அவர் தெரிவித்தார்.